City vs United mechi ya wababe Premier

Manchester, England. Mechi ya Manchester Dabi itakayopigwa leo Jumapili kwenye Uwanja wa Etihad, itatoa ushindani kwa Manchester City na Manchester United, huku timu zote mbili zikikabiliana na hali ngumu msimu huu.

Man City, chini ya kocha Pep Guardiola, wako katika hali ngumu baada ya kupoteza michezo kadhaa muhimu, ikiwa ni pamoja na kupokea kipigo cha mabao 2-0 kutoka kwa Juventus kwenye Ligi ya Mabingwa Ulaya. Hali hii imeleta maswali mengi kuhusu uwezo wa Guardiola kudhibiti timu yake, hasa baada ya kupoteza michezo saba kati ya kumi ya mwisho walizocheza katika mashindano yote.

Ingawa walishinda 3-0 dhidi ya Nottingham Forest, timu hiyo ilionyesha udhaifu mkubwa katika sare ya 2-2 dhidi ya Crystal Palace. Hivi sasa, City wapo nafasi ya nne katika Ligi ya England ambayo ni maarufu kama Premier League.

Katika mechi hii, Guardiola atawakosa Rodri, Nathan Ake na Oscar Bobb, huku Rico Lewis akikosekana kutokana na kadi nyekundu aliyopewa dhidi ya Crystal Palace. Hii itawalazimu kufanya mabadiliko kwenye safu ya ulinzi.

Man United, wamekuwa na mwenendo mbaya pia, wakiwa  nafasi ya 13 kwenye msimamo wa Premier League baada ya kupoteza michezo miwili mfululizo dhidi ya Arsenal na Nottingham Forest.

Hata hivyo, kocha Ruben Amorim amekuja na mabadiliko muhimu na alionyesha umahiri wake katika Ligi ya Europa, alipowasaidia mashetani hao wekundu kushinda dhidi ya Viktoria Plzen. Rasmus Højlund alifunga mabao mawili muhimu katika mchezo huo, akionyesha kiwango cha juu cha uchezaji.

Hata hivyo, United wanahitaji kuboresha kiwango chao ugenini, kwani hawajashinda michezo mitano ya mwisho ya Premier League wakiwa ugenini.

Timu hiyo itamkosa Luke Shaw, ambaye ana majeraha ya mfupa, lakini Jonny Evans anatarajiwa kuwa tayari kwa mechi hii. Kocha Amorim anatarajiwa kufanya mabadiliko kwenye kikosi, na wachezaji kama Joshua Zirkzee na Marcus Rashford wanahitaji kuboresha kiwango chao baada ya kushindwa kuwika kwenye mechi za hivi karibuni.

Kwa upande wa wachezaji, Haaland atakuwa na jukumu kubwa la kuongoza mashambulizi ya City, huku akijiandaa kupambana na ulinzi wa United, ambao utaongozwa na Lisandro Martínez na Matthijs de Ligt. Mechi hii inatoa fursa kwa wachezaji kama Mason Mount, Alejandro Garnacho, na Marcus Rashford wa United kuonyesha ubora wao mbele ya wachezaji wa City, ikiwa ni pamoja na Kyle Walker, ambaye anaonekana kuwa na changamoto ya kukabiliana na washambuliaji wenye kasi kama hao.

Hii itakuwa ni mechi muhimu kwa pande zote mbili, kwani ushindi utaimarisha nafasi zao kwenye msimamo wa Premier League. Manchester City wanahitaji kurekebisha udhaifu wao katika ulinzi, huku Manchester United wanahitaji kumaliza mfululizo wa matokeo mabaya ugenini.

Dabi hii inatarajiwa kuwa na ushindani mkubwa na kujua ni nani atakayepata ushindi kutatoa picha kamili ya nani ana nafasi kubwa ya kufika mbali msimu huu.