Ifanye ndoa yako kuwa sehemu ya uchumi

Dar es Salaam. Ndoa kwa kawaida imekuwa ikitazamwa kama muungano wa kihisia, kijamii, na kidini unaofungamana na upendo, uaminifu na wajibu wa ndoa.

Hata hivyo, katika nyanja ya uchumi wa familia, ndoa pia hutambuliwa kama mkataba wa kiuchumi baina ya watu wawili wanaoungana si tu kwa mapenzi bali pia kwa lengo la kushirikiana katika kugawana rasilimali, majukumu na hatima ya kiuchumi.

Watu huingia kwenye ndoa si kwa sababu za kihisia tu, bali pia kwa nia ya kukuza manufaa ya pamoja, ambayo hayawezi kufikiwa kirahisi na mtu peke yake.

Katika muktadha huu, ndoa ni mkataba wa ushirikiano wa kiuchumi ambapo pande mbili zinakuja pamoja kwa makubaliano ya wazi au ya kimyakimya kuhusu kazi, mapato, matumizi na mustakabali wa familia.

Msingi wa makubaliano haya ni kwamba kila mshiriki atafaidika zaidi ndani ya ndoa kuliko angekuwa nje ya ndoa.

Mgawanyo wa kazi ni kiini cha ufanisi wa ndoa kama taasisi ya kiuchumi. Katika familia nyingi, wanaume huchukua jukumu la kufanya kazi za kulipwa nje ya nyumba, wakati wanawake hujikita zaidi katika kazi zisizolipwa kama malezi ya watoto.

Ingawa mgawanyo huu unabadilika kadri wanawake wanavyoingia kwa wingi zaidi katika soko la ajira, bado ni ukweli kwamba kazi zisizolipwa ndani ya familia, zina mchango mkubwa kwa ustawi wa familia na zinapaswa kutambuliwa kama sehemu ya mkataba wa kiuchumi wa ndoa.

Ndoa huwezesha kuunganisha mapato ya pande zote mbili, jambo linalowapa wanandoa uwezo mkubwa zaidi wa kutimiza malengo ya muda mrefu kama vile kununua ardhi.

Wanandoa pia huweza kuweka mipango ya pamoja ya kifedha kama kuweka akiba, kuwekeza kwenye elimu ya watoto, au kujipanga kwa ajili ya ustaafu.

Ndani ya ndoa kuna uwekezaji wa pamoja katika maendeleo ya familia, hususani katika elimu na afya ya watoto. Maamuzi ya pamoja kuhusu aina ya shule, bima ya afya, au malezi ya watoto yana athari za kiuchumi na kijamii kwa kizazi husika. Hii inaifanya ndoa kuwa chombo muhimu cha uzalishaji wa mtaji wa binadamu ambacho ni msingi wa maendeleo ya taifa.

Hata hivyo, ili ndoa ifanye kazi kama mkataba wa kiuchumi, ni lazima kuwepo na usawa, mawasiliano ya wazi, na mgawanyo wa haki wa majukumu na rasilimali. Katika baadhi ya jamii, ukosefu wa usawa wa kijinsia huathiri mkataba huu kwa kumuweka mmoja wa wanandoa (mara nyingi mwanamke) katika hali ya utegemezi wa kiuchumi.

Kwa kumalizia, ndoa si tu taasisi ya kihisia au kijamii, bali ni pia taasisi ya kiuchumi yenye mchango mkubwa kwa maendeleo ya familia na jamii kwa ujumla.