Prime
Mwandae mtoto kiuchumi kwa kumnyima chakula
Muktasari:
- Kwa maneno mengine, mtoto anayejifunza kujizuia dhidi ya matamanio ya mara kwa mara ya chakula, huwa katika nafasi nzuri ya kukuza nidhamu ya kiuchumi na uelewa wa kupanga matumizi.
Katika safari ya kumlea mtoto mwenye uwezo wa kujitegemea kiuchumi, maadili ya matumizi na nidhamu ya kifedha ni mambo ya msingi yanayopaswa kujengwa mapema.
Ingawa mara nyingi tunahusisha elimu ya kifedha na masuala ya akiba au matumizi ya pesa moja kwa moja, kwa hakika tabia ya kujinyima katika chakula inaweza kuwa njia mojawapo muhimu ya kumfundisha mtoto maadili ya uchumi wa binafsi.
Kwa maneno mengine, mtoto anayejifunza kujizuia dhidi ya matamanio ya mara kwa mara ya chakula, huwa katika nafasi nzuri ya kukuza nidhamu ya kiuchumi na uelewa wa kupanga matumizi.
Kujinyima katika chakula humfundisha mtoto umuhimu wa kupanga matumizi kwa uangalifu. Kwa mfano, iwapo mtoto hupewa kiasi fulani cha pesa kununua chakula shuleni, na akaamua kutumia sehemu ndogo tu huku akihifadhi nyingine kwa siku zijazo, anajifunza kwa vitendo dhana ya bajeti.
Kwa kufanya hivyo kwa kurudia, mtoto hujenga misingi ya kutanguliza mahitaji muhimu kuliko matamanio ya muda mfupi.
Pia, kujinyima katika chakula humfundisha mtoto subira na uwezo wa kufanya uamuzi wa kifedha wenye malengo ya muda mrefu. Kwa mfano, mtoto anayeweza kujizuia kununua peremende kila siku kwa lengo la kuokoa fedha hizo kwa ajili ya kitu kikubwa zaidi kama vile kitabu au kiatu, huwa anaanza kuelewa maana ya kuwekeza.
Zaidi ya hayo, tabia ya kujinyima pia humjenga mtoto kuwa na nidhamu binafsi ambayo ni msingi wa maisha ya kiuchumi yenye utulivu.
Nidhamu ya chakula kwa mfano kula kwa ratiba, inaakisi uwezo wa mtu kudhibiti uamuzi binafsi. Mtoto anapokuwa na uwezo huo, huwa na uwezekano mkubwa wa kupanga maisha yake ya kifedha bila kuwa tegemezi kwa wazazi au jamii anapokuwa.
Hii ni kwa sababu mtu mwenye nidhamu katika jambo moja huwa na nafasi kubwa ya kuwa na nidhamu katika maeneo mengine, ikiwa ni pamoja na fedha.
Kwa kuongezea, kujinyima kunamfundisha mtoto kuweka akiba hata katika hali ndogo. Akiba si lazima iwe fedha tu; inaweza kuwa pia katika namna ya matumizi finyu ya rasilimali.
Mtoto akijifunza kula kwa kiasi, hutambua umuhimu wa kutotumia zaidi ya uwezo wake, jambo ambalo linaakisi uelewa wa matumizi bora ya rasilimali, huu ni msingi muhimu katika maisha ya kiuchumi.
Kujinyima katika chakula si tu mafunzo ya kiafya au kimaadili, bali pia ni darasa halisi la masuala ya kiuchumi. Mtoto anapojifunza kujizuia dhidi ya tamaa ya chakula, huanza kufahamu misingi ya kupanga, kuokoa, na kutumia kwa uangalifu.
Ni jukumu la wazazi, walimu, na jamii kwa ujumla kuhakikisha kwamba tabia hii inafundishwa, kuenziwa na kuungwa mkono.
