Mazoezi yanavyoondoa msongo, wasiwasi

Dar es Salaam. Utafiti mpya unaonyesha kuwa mazoezi ya mwili yanaweza kuwa na ufanisi unaokaribiana na dawa katika kupunguza dalili za msongo wa mawazo na wasiwasi.

Matokeo haya yametolewa na watafiti baada ya kuchambua kazi za  kitafiti nyingi zilizofanywa duniani kote, na yanathibitisha kwamba kuushughulisha  mwili kimazoezi  si tu kunaongeza nguvu za kimwili bali pia kuna faida kubwa kwa afya ya akili.

Watafiti wanasema kuwa mazoezi yanaweza kusaidia kupunguza dalili za huzuni, kukosa nguvu na mawazo hasi, ambazo mara nyingi huambatana na msongo wa mawazo na hali ya wasiwasi. Aidha, faida hizo hazionekani tu kwa vijana bali pia kwa wazee. Uchambuzi huu wa utafiti huo uliochapishwa katika Jarida la mtandaoni la The Conversation, umeonyesha kuwa kwa baadhi ya watu, matokeo yanayopatikana kutokana na kufanya mazoezi yanafanana na yale yanayopatikana kutokana na watu wanaotumia  dawa au tiba za kisaikolojia. Kifupi mazoezi ni tiba tosha

Mazoezi gani?

Shughuli za mwili kama kutembea kwa mwendo wa haraka, kukimbia, kuogelea, kuendesha baiskeli au kucheza dansi, zimeonyesha kutoa nafuu kubwa kwa watu wenye dalili za msongo wa mawazo.

 Mazoezi haya huchochea uzalishaji wa kemikali muhimu katika ubongo kama serotonini na dopamini, ambazo husaidia kuboresha hisia za mtu. Pia hupunguza homoni zinazohusiana na msongo, husaidia usingizi, na kuimarisha kujiamini na kujithamini.

Watafiti pia wanabainisha kuwa mazoezi yanaweza kutoa nafasi ya kijamii. Shughuli za pamoja, kama kujiunga na vikundi vya mazoezi au michezo, hutoa nafasi ya kuzungumza na kushirikiana na wengine, jambo ambalo linaongeza hisia za furaha na kupunguza upweke, hali inayoweza kuongeza wasiwasi na huzuni.

Lakini wataalamu wanasisitiza kuwa mazoezi hayapaswi kuchukuliwa kama mbadala wa matibabu kwa kila mtu. Watu wenye dalili kali za msongo wa mawazo au wasiwasi wanashauriwa kushauriana na wataalamu wa afya ili kupata mpango sahihi wa matibabu. Hata hivyo, kujumuisha mazoezi ya kila siku, hata yale ya kiwango cha chini hadi cha wastani, ni njia salama, nafuu na yenye manufaa ya kusaidia afya ya akili.

Matokeo haya yamethibitishwa na tafiti nyingi ambazo zinaonyesha kuwa mazoezi ya mwili yanaweza kupunguza msongo wa mawazo na wasiwasi kwa kiwango kinachofanana na matibabu ya kawaida, huku yakiimarisha hali ya hisia, kuondoa mawazo hasi, na kuboresha maisha ya kila siku ya mtu.

Watafiti wanashauri kuwa ili kupata faida kamili, mazoezi haya yanapaswa kuwa ya mara kwa mara na ya kudumu.

Kwa muktadha huu, wataalamu wanahimiza kila mtu kujumuisha shughuli za mwili katika maisha ya kila siku. Hii ni njia rahisi, salama na yenye gharama nafuu ya kupunguza msongo wa mawazo na wasiwasi, huku ikiboresha afya ya mwili na akili kwa ujumla.

Kwa hakika, utafiti huu unaleta matumaini mapya kwa watu wengi wanaokabiliana na changamoto za afya ya akili, huku ukionyesha kuwa njia ya asili na isiyo na madhara kama mazoezi inaweza kuwa suluhisho thabiti kwa baadhi ya wagonjwa.