Raia wa Lithuania ahukumiwa maisha jela
Muktasari:
Christina ambaye ni mwanamuziki katika Jiji la Kaunas, alikamatwa Agosti 28,2012 saa 9:00 alasiri katika Uwanja wa Ndege wa Kimataifa wa Kilimanjaro (Kia) akisafirisha gramu 3,775.26 za heroin zenye thamani ya Sh169 milioni.
Moshi. Mahakama Kuu Kanda ya Moshi, imemhukumu kifungo cha maisha jela, raia wa Lithuania, Christina Biskavskaja baada ya kupatikana na hatia ya kusafirisha dawa za kulevya kwenda Ubelgiji.
Christina ambaye ni mwanamuziki katika Jiji la Kaunas, alikamatwa Agosti 28,2012 saa 9:00 alasiri katika Uwanja wa Ndege wa Kimataifa wa Kilimanjaro (Kia) akisafirisha gramu 3,775.26 za heroin zenye thamani ya Sh169 milioni.
Hukumu hiyo imetolwa leo Februari 15, 2018 na Jaji Mfawidhi wa Mahakama Kuu Kanda ya Moshi, Aishiel Sumari, aliyesema ushahidi wa mashahidi saba wa upande wa mashtaka, ni mzito na umethibitisha shtaka dhidi ya mshtakiwa huyo.
Kesi hiyo iliendeshwa na wakili mwandamizi wa Serikali, Tamari Mndeme aliyesaidiana na mawakili wa Serikali, Ignas Mwinuka na Sabitina Mcharo wakati mshtakiwa alitetewa na Patrick Paul.
Akisoma hukumu hiyo, Jaji Sumari amesema ushahidi wa upande wa mashtaka ulikuwa mzito na haukuacha mashaka kuwa begi lililokuwa na dawa hizo lilikuwa la mshtakiwa.
Jaji Sumari aliukataa utetezi wa mshtakiwa kuwa alibambikiwa kesi hiyo na polisi wa Tanzania, na kuhoji hilo linawezekanaje wakati mashahidi wa upande wa mashtaka walikuwa hawafahamiani na mshtakiwa.
