Simulizi ya eneo alikofia mkurugenzi Tanesco

Bunda. Baadhi ya wakazi wa Bunda, mkoani Mara wamesema ni jambo la kawaida kuwapo waendesha baiskeli usiku eneo la Nyatwali lililotokea ajali ya gari iliyosababisha vifo vya Mkurugenzi Mtendaji wa Shirika la Umeme Tanzania(Tanesco), Gissima Nyamo-Hanga na dereva wake, Muhajiri Haule.

Ajali hiyo ilitokea usiku wa kuamkia Jumapili, Aprili 13,2025 eneo la Nyatwali wilayani Bunda wakati Nyamo-Hanga na Haule wakitokea Dodoma.

Kamanda wa Polisi Mkoa wa Mara, Pius Lutumo akizungumza jana Jumapili amesema ajali hiyo ilitokea saa 7:30 usiku Nyatwali karibu na geti la Ndabaka la kuingia Hifadhi ya Taifa ya Serengeti.

Amesema chanzo cha tukio hilo ni dereva wa gari alilokuwamo Nyamo-Hanga aina ya  Toyota Landcruser kumkwepa mwendesha baiskeli kisha kupoteza  mwelekeo na kugongana uso kwa uso na lori lililokuwa mbele yao.

Leo Jumatatu, Aprili 14, 2025, Mwananchi imezungumza na baadhi ya wananchi wanaoifahamu eneo hilo kulipotokea ajali ambao wamesema ni kawaida baskeli kuendeshwa usiku na wengi wao ni wauza mkaa.

Mmoja wa wakazi hao, Joram Sinai amesema wauza mkaa wengi huwa wanafanya biashara hiyo usiku ili kuwakwepa maofisa maliasili ambao wamekuwa wakiwakamata wakiwakuta na mkaa.

"Wauza mkaa wengi huwa wanaleta mkaa mjini usiku na wanafanya hivyo kuwakwepa watu wa maliasili ambao mara nyingi wanafanya doria  usiku na mchana kwa ajili ya wauza mkaa," amesema Sinai.

Amesema ukwepaji huo unatokana na ukweli kuwa, wengi wao hawana vibali vya kufanya biashara hiyo.

Nyambili Gabriel amesema: "Asubuhi wengi wanakuwa shambani au wanapakua mkaa kutoka kwenye tanuru kwa hiyo muda mzuri wa kwenda mjini kuuza mkaa ni usiku," amesema.

Mkazi mwingine, Richard Nyoswede amesema licha ya kuendesha baiskeli usiku, wauza mkaa hao hawana uhakika wa kufika sokoni na bidhaa zao, kwa kuwa mara kadhaa wanakamatwa na maofisa hao walioanzisha utaratibu wa kufanya doria usiku.

Ndugu wa marehemu

Mwananchi imezungumza na baadhi ya ndugu  nyumbani kwa Nyamo-Hanga eneo la Migungani mjini Bunda, wamesema wamepoteza nguzo ya familia huku wakidai hawakuwa na taarifa juu ya ujio wake nyumbani.

Kisyeri Gissima amesema enzi za uhai wake Nyamo-Hanga alikuwa ni mtu mwenye mapenzi na ndugu na jamaa zao na hakuwa mbaguzi bali  alikuwa na tabia ya kutembelea ndugu mara kwa mara.

"Mara ya mwisho tulikuwa naye katika Kijiji cha Baranga wilayani Butiama kwenye msiba wa mjomba wake, nakumbuka ilikuwa ni mwezi wa pili mwaka huu na muda wote alikuwa akishirikiana na ndugu bila kujali nafasi aliyokuwa nayo," amesema Gissima.

Amesema kutokana na mapenzi aliyokuwa nayo juu ya ndugu na jamaa alikuwa na utaratibu wa kufika mara kwa mara kijijini hapo kuwajulia hali pale wanapopata matatizo yakiwamo ya misiba, licha ya majukumu mengi aliyokuwa nayo.

“Tulishangaa baada ya kupata taarifa za ajali hiyo, sisi kama familia hatukujua kama anakuja huku siku hiyo,” amesema Gissima.

Naye kaka wa marehemu, Robert Nyamo-Hanga amesema;

"Mimi naishi Dar es Salaam, nilipewa taarifa ya msiba na shemeji yangu jana asubuhi, kwa kweli nilipatwa na mshtuko mkubwa na nilipoteza fahamu, ndugu yangu amefariki ghafla mno, nimeumia sana na hakutuambia kama angekuja huku nyumbani, hatuelewi inatuuma sana,” amesema kaka yake huyo.

Robert ambaye anasema ndiye aliyemlea  Nyamo-Hanga tangu utotoni, amesema alikuwa ni mtu mwenye upendo wa hali ya juu na msikivu siku zote.

“Kwa kweli alikuwa nguzo ya familia, kifo chake ni pigo kubwa kwetu, mpaka sasa sijui tutafanyaje, nguzo imeanguka alikuwa tegemeo kubwa kwetu,” amesema kaka yake huyo.

Biteko kuongoza mazishi

Naibu Waziri Mkuu na Waziri wa Nishati, Dk Doto Biteko ataongoza maziko ya Nyamo- Hanga.

Akizungumza na waandishi wa habari leo Jumatatu Aprili 14, 2025 baada ya kukagua maandalizi ya mazishi, Mkuu wa Mkoa wa Mara, Evans Mtambi amesema maziko ya Nyamo-Hanga yatafanyika katika eneo la Migungani mjini Bunda, Jumatano Aprili 16, 2025.

Amesema msiba wa Nyamo-Hanga ni pigo kwa Mkoa wa Mara kwa ujumla kwa maelezo kuwa amekuwa na mchango mkubwa katika kufanikisha masuala mbalimbali hususan yahusuyo nishati ya umeme.

"Kama mtakumbuka hivi karibuni tulipata maafa ambapo kaya zaidi ya 300 zilikosa makazi baada ya nyumba zao kuezuliwa na upepo kutokana na mvua iliyonyesha, katika tukio hilo, taasisi nyingi pia ziliathirika ikiwamo Tanesco, lakini nilivyowasiliana na Nyamo-Hanga alihakikisha umeme unarejea ndani ya muda mfupi, niseme Tanesco ilikuwa taasisi ya kwanza kurejesha miundombinu yake kwa ufasaha ndani ya muda mfupi," amesema mkuu huyo wa mkoa.

Ameongeza kuwa wiki iliyopita pia aliwasiliana na Nyamo-Hanga kuhusu suala la umeme katika hule ya Amali inayojengwa wilayani Butiama, mkurugenzi huyo mtendaji alishughulikia jambo hilo na kulipatia ufumbuzi kwa haraka.

Mwili wa dereva kuzikwa mkoani Pwani kesho

Mkurugenzi wa Tanesco Kanda ya Ziwa, Satco Nombo amesema mwili wa dereva Muhajiri Haule ulisafirishwa jana kwenda mkoani Pwani kwa ajili ya mazishi yanayotarajiwa kufanyika kesho.

"Mwili umewasili Pwani tayari na mazishi yanatarajiwa kufanyika kesho na hapa pia maandalizi yanaendelea vizuri, hadi sasa hakuna changamoto yoyote,” amesema.