Ronaldo, Messi wageuka wawekezaji

Kwa miaka mingi, ushindani wa uwanjani kati ya Cristiano Ronaldo na Lionel Messi ulitawala soka la dunia. Nyota hawa wawili walipambana vikali kutwaa mataji ya timu na tuzo binafsi, hasa wakati Ronaldo alipokuwa akichezea Real Madrid kwa miaka tisa na kukutana moja kwa moja na kikosi maarufu cha Barcelona cha Messi.

Kati ya mwaka 2008 na 2021, wawili hao walishinda tuzo 12 kati ya 13 za Ballon d'Or, huku mfululizo huo ukikatizwa tu na Luka Modric mwaka 2018.

Katika miaka ya hivi karibuni, kadri muda wao wa kucheza unapokaribia mwisho wakiwa katika klabu za Inter Miami na Al-Nassr, mechi za maonyesho zimekuwa zikiandaliwa mara kwa mara ili kuwaweka tena uso kwa uso wapinzani hawa wa kihistoria.

Hata hivyo, katika miezi ya karibuni, ushindani mpya nje ya uwanja umeibuka baada ya wote wawili kuwekeza kwenye klabu za soka za Hispania.

Mnamo Februari, Ronaldo alinunua asilimia 25 ya hisa katika klabu ya Almeria, huku Messi akichukua udhibiti wa UE Cornella wiki iliyopita.

Lakini klabu hizi ni zipi, uwekezaji huu una maana gani, na wana malengo gani?

Klabu mpya ya Messi, UE Cornella, iko katika eneo la Catalonia ambako Barcelona ipo. Wanacheza katika daraja la tano la soka la Hispania, Tercera Federacion, ingawa waliwahi kucheza kwa misimu 10 katika daraja la tatu kati ya 2014 na 2024. Uwanja wao, Camp Municipal de Cornella, una uwezo wa kuchukua mashabiki 1,500 tu.

Kwa upande mwingine, Ronaldo amewekeza juu zaidi katika mfumo wa ligi kupitia Almeria. Kwa sasa wako nafasi ya tatu katika Segunda Division na wanapigania kurejea LaLiga, ambako wamecheza kwa misimu minane tangu 2007. Uwanja wao una uwezo wa kuchukua mashabiki 17,400.

Kwa nini wamewekeza na malengo yao ni yapi?

Uwekezaji wa Ronaldo katika Almeria unaimarisha uhusiano wake na Saudi Arabia, kwani klabu hiyo inamilikiwa kwa asilimia 75 na muungano wa wawekezaji kutoka nchini humo unaoongozwa na Mohammed Al-Khereiji, ambaye alihusika katika uhamisho wake kwenda Al-Nassr. Klabu hiyo hapo awali ilikuwa chini ya umiliki wa Turki Al-Sheikh.

Hatua hii pia inaendana na ndoto ya muda mrefu ya Ronaldo ya kumiliki klabu. Aliwahi kusema kuwa matatizo ya baadhi ya klabu kubwa za Ulaya, ikiwemo Manchester United, hayahusiani tu na makocha bali ni ya kimfumo, na anaamini angeweza kuyarekebisha akiwa mmiliki.

Aidha, Ronaldo anaona hii kama njia ya kupanua biashara zake na kuendelea kubaki karibu na soka baada ya kustaafu. Anaamini Almeria ina msingi mzuri na uwezo wa kukua hadi kufikia LaLiga tena.

Kwa upande wa Messi, ana nia ya kusaidia Cornella kupanda ngazi za soka la Hispania huku akiimarisha uhusiano wake na Barcelona, kwani uwanja wa klabu hiyo uko karibu sana na Camp Nou. Pia ameonyesha kujitolea kwake katika kukuza vipaji vya vijana katika eneo la Catalonia.

Ingawa Messi hajazungumza sana hadharani tangu uwekezaji wake utangazwe, mfumo mzuri wa kukuza vipaji wa Cornella unaonekana kuwa kivutio kikubwa kwake, pamoja na fursa ya kukuza wachezaji chipukizi.

Je, klabu hizi zina wachezaji maarufu waliowahi kupita?

Ndiyo. Kwa Cornella, wengi walipitia katika mfumo wa vijana, akiwemo David Raya ambaye sasa ni kipa wa Arsenal. Pia, gwiji wa Barcelona Jordi Alba aliwahi kucheza hapo kabla ya kuuzwa kwenda Valencia.

Kwa upande wa Almeria, majina kadhaa makubwa yamewahi kupita, kama Alvaro Negredo aliyepata nafasi ya kwenda Real Madrid, na Darwin Nunez, pamoja na Sofiane Feghouli na Tomer Hemed.

Je, wanaweza kukutana uwanjani?

Inawezekana, lakini si rahisi kwa sasa. Klabu hizi ziko katika madaraja matatu tofauti. Wangeweza kukutana katika mechi ya kirafiki, hasa kabla ya msimu kuanza au katika mashindano kama Copa del Rey, ingawa Cornella haikufuzu hata hatua za awali msimu huu.

Hata hivyo, kutokana na malengo yao ya kupanda madaraja, kuna matumaini kuwa siku moja timu hizi zinaweza kukutana, huku nyota hawa wawili wakianza kupanga maisha yao baada ya kucheza soka.