Mabasi ya shule kuwa na mhudumu wa kike, kiume

Dar es Salaam. Wizara ya Elimu, Sayansi na Teknolojia, imewataka wamiliki wa shule wanaotoa huduma za usafiri kwa wanafunzi kuwa na mhudumu wa kike na wa kiume kwenye kila gari.

Agizo hilo limetolewa limetolewa na wizara hiyo kupitia waraka wake uliosainiwa na Kamishna wa Elimu, Dk Lyabwene Mutahaba.

Kulingana na waraka huo, mmiliki wa shule atakayeshindwa kutekeleza hilo, anapaswa kutoa taarifa ya sababu ya kushindwa kwa wathibiti ubora.

"Endapo itashindikana kabisa mhudumu wakike atumike kutoa huduma kwenye gari husika baada ya kutoa taarifa kwa mthibiti ubora wa shule," umeeleza waraka huo.

Utekelezaji wa maelekezo hayo, kwa mujibu wa waraka huo unapaswa kuanza kabla ya muhula wa pili wa masomo kwa mwaka 2023.

Maelekezo mengine ni kuacha kuweka miziki, picha na video zinazokwenda kinyume na maadili na badala yake, ziwekwe zinazojenga maadili na uzalendo kwa wanafunzi.

"Kumkomesha vitendo vya ukatili kwa wanafunzi wanapokuwa kwenye mabasi na kuwa na ratiba rafiki za safari ili wanafunzi hususan watoto wadogo wapate muda wa kutosha wa kupumzika," umeeleza waraka huo.

Waraka huo, umeelekeza magari yote yanayosafirisha wanafunzi yanapaswa kuwa na vioo angavu na watumishi kwenye usafiri wawe waaminifu.