Umuhimu mikopo kwa njia ya kidijitali ikiongezeka nchini
Mikopo ya kidijitali imekuwa suluhisho muhimu kwa upatikanaji wa huduma za kifedha nchini Tanzania. Kwa kuzingatia ukuaji wa teknolojia na upatikanaji wa huduma za simu za mkononi, mikopo hii imeleta mapinduzi makubwa katika sekta ya kifedha, hususan kwa watu ambao awali hawakuwa na uwezo wa kupata mikopo ya haraka na kiwango kidogo kutoka benki na taasisi nyingine.
Huduma hizi zimerahisisha urasimishaji wa mikopo, na kusaidia watu kupata mikopo midogo kwa urahisi na haraka.
Tanzania imekuwa shuhuda wa ongezeko la matumizi ya mikopo ya kidijitali kutokana na mifumo ya malipo kidijitali. Hii imewezesha Watanzania wengi kupata mikopo kwa kutumia simu zao za mkononi.
Vilevile, kuna taasisi ambazo zimeanzisha mikopo hii kupitia programu za simu au wavuti, ambapo mteja anaweza kukopa na kurudisha fedha zake bila hitaji la dhamana au masharti magumu.
Mikopo ya kidijitali imeongeza ujumuishaji wa kifedha nchini Tanzania. Kupitia huduma hizi, watu ambao awali hawakuwa na sifa za kupata mikopo kutoka benki wameweza kupata mikopo midogo kwa ajili ya mahitaji ya dharura, kuendesha biashara ndogondogo, au hata kulipia huduma muhimu kama ada za shule na matibabu.
Mikopo imeweza kuboresha sekta isiyo rasmi kwa kuwasaidia wafanyabiashara wadogo na wajasiriamali kuwekeza zaidi katika biashara zao, kuongeza mtaji, na kutoa ajira kwa wengine.
Kwa kutumia simu ya mkononi, wengi wameweza kupata huduma za kifedha bila kulazimika kusafiri kwenda kwenye matawi ya benki. Hii imepunguza gharama za usafiri na kuongeza ufanisi wa shughuli za kifedha. Mikopo ya kidijitali imeweza kutolewa kwa muda mfupi, hata nje ya muda wa kazi, hivyo kukidhi mahitaji ya kifedha ya dharura.
Hata hivyo, pamoja na umuhimu wake, mikopo ya kidijitali inakabiliwa na changamoto kadhaa. Hizi ni pamoja na riba kubwa, ukosefu wa elimu ya kifedha kwa watumiaji, na tatizo la usalama wa taarifa za wateja. Riba kubwa imekuwa inasababishwa na matumizi ya mifumo ya ulipaji ambayo hutoza kiasi kikubwa kwenye miamala. Watumiaji wengi wamejikuta wakikopa bila kuelewa kikamilifu masharti ya marejesho, hali inayopelekea mzigo wa madeni.
Kampuni zitoazo mikopo zimekuwa zikitumia taarifa za wateja bila miongozo thabiti, na hivyo kusababisha malalamiko juu ya mbinu za kukusanya madeni ambazo zinaweza kuharibu taswira ya sekta hii.
Ili kuhakikisha mikopo ya kidijitali inachangia vyema katika maendeleo ya kifedha na kiuchumi nchini Tanzania, serikali imetengeneza sera ya ulinzi wa taarifa za faragha ambayo imeshaanza kufanya kazi zake. Pia, Benki Kuu ya Tanzania hivi karibuni imetoa miongozo ya kuratibu utoaji wa mikopo ya kidijitali, ikilenga kulinda faragha na kudhibiti riba.
Maendeleo ya teknolojia duniani yanatoa fursa ya kuboresha mikopo ya kidijitali ili kuwa daraja muhimu linalounganisha maendeleo ya kiuchumi na ujumuishaji wa kifedha kwa wote. Hivyo, ni jukumu la serikali na wadau mbalimbali kushirikiana kuhakikisha teknolojia inaleta ufanisi zaidi na usalama katika sekta hii muhimu.
Kwa upande wa wakopaji ni muhimu pia kuhakikisha unapokopa kupitia mikopo hii ya kidijitali unao wajibu wa kulipa.
