Dk Biteko asisitiza maadili, uwezo wa uongozi

Dodoma.  Kauli ya Naibu Waziri Mkuu na Waziri wa Nishati, Dk Doto Biteko ya kuwaonya watu wanaotumia fedha kusaka uongozi wakati wa uchaguzi, ni mwendelezo wa elimu ya mpiga kura kuekelea uchaguzi ujao wa Serikali za mitaa.

Karibu mara tatu mfululizo ndani ya wiki hii, Dk Biteko amekuwa akitoa kauli hiyo.

Alianza kuitoa wakati akifunga maonesho ya saba ya kitaifa ya Mifuko ya Programu za Uwezeshaji Wananchi Kiuchumi yaliyokuwa yakifanyika mkoani Singida na kumalizika Septemba, mwaka huu.

Hivyo, kauli hiyo inaashiria mwelekeo wa uongozi unaoweka mbele uwezo na maadili kuliko hali ya kifedha katika uchaguzi wa Serikali za mitaa utakaofanyika Jumatano ya Novemba 27, mwaka huu.

Dk Biteko ameonesha mwanga kuhusu umuhimu wa uchaguzi huo katika kuimarisha utawala bora na maendeleo ya jamii.

Kwa kuzingatia kauli hiyo, wananchi wanapaswa kuwa makini katika uchaguzi, kuhakikisha wanachagua viongozi wenye uwezo, maadili na uchungu wa maendeleo ya watu.

Dk Biteko kwenye kauli yake amegusa masuala muhimu ya kidemokrasia, uwajibikaji na haki katika michakato ya uchaguzi.

Maudhui ya kauli ya Dk Biteko yanaashiria changamoto katika demokrasia, mara kadhaa baadhi ya wagombea wenye uwezo wa kifedha na wasiokuwa na maadili hutumia fedha kushinda uchaguzi, huku wagombea wenye uwezo na maono lakini hawana  fedha, hujikuta wakikosa fursa ya kuchaguliwa kwenye nafasi za uongozi.

Umuhimu wa uchaguzi

Dk Biteko amesisitiza umuhimu wa uchaguzi wa Serikali za mitaa, akisema  siyo mdogo kama wengi wanavyoweza kufikiria.

Kwa maoni yake, uchaguzi wa Serikali za mitaa ni muhimu kwa maendeleo ya Taifa, kwa kuwa unatoa fursa ya kuchagua viongozi wanaojua hali halisi ya maisha ya wananchi katika ngazi za mitaa.

“Uchaguzi huu ni hatua muhimu katika kuimarisha utawala bora na usimamizi wa maendeleo katika maeneo ya mitaa, hivyo hautakiwi kupuuzwa,” anasema.

Pia, Dk Biteko anahimiza wananchi kuchagua viongozi kwa kuzingatia sifa na uwezo wa kiutendaji badala ya hali ya kifedha au ukabila.

Uhusiano kati ya fedha, uongozi 

Katika demokrasia yenye afya, uongozi unapaswa kuwa matokeo ya uchaguzi wa haki, sifa za kiutendaji na uwezo wa kiongozi zinapaswa kuwa kipande muhimu cha kuzingatiwa.

 Hata hivyo, mara nyingi watu wenye uwezo mkubwa wa kifedha wanaweza kutumia rasilimali zao kupunguza ushindani na kuingia katika nafasi za uongozi bila kuzingatia uwezo wao halisi wa kuongoza.

Matumizi ya fedha katika uchaguzi yanaweza kuwa na athari za moja kwa moja katika usawa na haki ya michakato ya uchaguzi kama anavyofafanua naibu waziri mkuu huyu.

 Dk Biteko anasema mara nyingi wagombea wenye fedha wanaweza kutumia kampeni za gharama kubwa, kutoa rushwa au kutumia mbinu nyingine za kifedha ili kujihakikishia ushindi wao.

Anasema hiyo inachangia wananchi kujikuta wakichagua viongozi kutokana na nguvu za kifedha badala ya kuzingatia uwezo wao wa kiutendaji na maono yao ya maendeleo.

Kutokomeza tabia ya kutumia fedha kama kipande cha sifa ya uongozi, ni wazi kuwa tamko lake linaunga mkono hatua za kuimarisha usawa na haki katika uchaguzi.

Hii inaweza kufikiwa kwa kutekeleza sheria zitakazowazuia wagombea kutumia fedha kwa njia zisizo sahihi, na kuongeza uwazi katika michakato ya uchaguzi.

Katika hali ambayo fedha zimekuwa kikwazo cha ukweli na uhalali katika michakato ya kidemokrasia, kupigania uchaguzi wa haki na uwajibikaji ni muhimu.

Pia, ni wito kwa wananchi na vyombo vya habari kushirikiana kuhakikisha uchaguzi unafanyika kwa uwazi, haki na bila ushawishi wa kifedha.

Hali hii itasaidia kuimarisha imani ya wananchi katika mfumo wa uchaguzi na kuhakikisha viongozi wanachaguliwa kwa sifa zao halisi.

Kuangalia uwezo, maono

Dk Biteko kwenye kauli yake amependekeza wananchi kuangalia uwezo wa viongozi kutatua matatizo ya jamii na kuleta maendeleo, kwa maana ya umuhimu wa kuhakikisha viongozi watakaochaguliwa wanakubalika na wenye uwezo wa kutatua changamoto za jamii zao kwa umakini na ufanisi.

Kwa mujibu wa Dk Biteko, viongozi wanapaswa kuwa na uchungu na maendeleo ya wananchi. 

Viongozi bora wanapaswa kuwa na maono na mipango ya kutatua matatizo ya wananchi na kuhakikisha maendeleo yanachochewa kila siku.

Pia, Dk Biteko anaonya kuchagua viongozi kwa misingi ya ukabila au udini, akisema  inaweza kuleta migawanyiko badala ya umoja. 

Maoni haya yanaonesha haja ya kuimarisha mshikamano na umoja wa kitaifa kwa kuhakikisha uchaguzi haukosi kwa misingi ya kikabila au kidini.

 Dk Biteko alihimiza kuwa, viongozi wanaopaswa kuchaguliwa ni wale wanaoweza kuangalia maendeleo ya wananchi kwa mtazamo mpana, bila kupendelea kwa misingi ya kikabila, kidini, au kiuchumi. 

Hii ni sehemu muhimu ya kujenga Taifa lenye umoja na mshikamano. Watanzania wanapaswa kujiuliza ikiwa viongozi wanaowachagua wanaweza kubeba majukumu yao na kutekeleza mipango inayohitajika kwa maendeleo ya nchi.

Anasema uchaguzi huu siyo tu kuhusu kuchagua viongozi bali ni kuhusu kuchagua wale wenye uchungu na maendeleo ya watu.

Kwa maana hali hii inahitaji uelewa wa hali halisi ya maisha ya wananchi, kutoka masuala ya kiuchumi hadi kijamii.

Hivyo, umakini wa kuchagua viongozi wenye maadili na uwezo wa kiutendaji ni muhimu kwa uendeshaji mzuri wa Serikali za mitaa na taifa kwa jumla.

Kauli hii ya Dk Biteko inachangia kuimarisha maadili ya uchaguzi na kuhakikisha viongozi wanachaguliwa kwa uwezo wao wa kuongoza na siyo kwa misingi ya upendeleo.

Msisitizo wake anataka uwezo wa kiutendaji na maono mazuri, ndio vinavyotakiwa katika kuchaguliwa kwa viongozi.

Hii ni kwa sababu viongozi wenye maono na uwezo wa kiutendaji wanaweza kuleta mabadiliko chanya na maendeleo katika jamii zao.

 Kwa mfano, kiongozi mwenye maono ya muda mrefu anaweza kuunda mipango ya maendeleo ya jamii, kuboresha huduma za kijamii na kuhakikisha rasilimali za umma zinatumika kwa ufanisi.

Viongozi wenye uchungu

Kuchagua viongozi wenye uchungu na maendeleo ya watu ni muhimu kwa sababu inahusisha uelewa halisi wa maisha ya wananchi.

Viongozi wanaojali maendeleo ya watu wanahitaji kuwa na uelewa wa masuala ya kiuchumi, kijamii na mazingira ya wananchi. 

Kwa mfano, kiongozi mwenye uchungu na maendeleo ya watu atachangia kutatua changamoto za kiuchumi kama ukosefu wa ajira, umaskini na maendeleo ya miundombinu.

Viongozi hawa pia, watashughulikia masuala ya kijamii kama elimu, afya na usalama wa wananchi.

Kama una maoni kuhusu habari hii, tuandikie ujumbe kupitia WhatsApp: 0765864917