Posho, chakula chanzo cha vipigo Senegal

MIAMI, Marekani: Haukuwa mwanzo ambao Senegal walikuwa wameutarajia katika Kombe la Dunia 2026.

Baada ya kufuzu mashindano hayo wakiwa miongoni mwa timu zinazotarajiwa kufanya vizuri kutoka Afrika, Senegal sasa iko hatarini kutolewa mapema baada ya kupoteza mechi zake mbili za kwanza. Sasa lazima waifunge Iraq kesho Ijumaa ili kubaki na matumaini ya kufuzu hatua ya mtoano.

Migogoro nje ya uwanja

Maandalizi ya Senegal yamegubikwa na matatizo mbalimbali kambini, ikiwa ni pamoja na: Malalamiko kuhusu malipo ya bonasi kuchelewa. Mabadiliko ya mpishi wa timu muda mfupi kabla ya mashindano.

Malalamiko kuhusu aina ya chakula kinachotolewa pamoja na mvutano kuhusu mkataba wa kocha mkuu.

Wachezaji na benchi la ufundi wanaishi katika hoteli ya Hyatt Regency huko New Jersey, karibu na uwanja wao wa mazoezi katika Chuo Kikuu cha Rutgers.

Ingawa kulikuwa na tetesi kuhusu ubora wa chakula, taarifa zinaeleza kuwa wachezaji hawakuwa na tatizo kubwa. Malalamiko mengi yalitoka kwa baadhi ya wajumbe wa msafara waliotaka chakula cha asili cha Senegal ambacho hakikupatikana mara kwa mara.

Bonasi zilicheleweshwa

Pia, kulikuwa na malalamiko kuhusu bonasi ambazo zilikuwa hazijalipwa kwa wakati. Serikali ya Senegal ilikuja kuzilipa siku chache zilizopita.

Kocha Pape Thiaw alikiri kuwepo kwa changamoto kadhaa, lakini akasisitiza kuwa timu imejikita zaidi katika mechi muhimu zinazofuata.

"Ni kweli kulikuwa na baadhi ya hitilafu, lakini sisi kama wachezaji, benchi la ufundi na shirikisho tumejikita kwenye mchezo unaofuata," alisema Thiaw.

Mvutano wa mkataba wa kocha

Jambo lililozua mjadala mkubwa zaidi lilikuwa mchakato mrefu wa kuhuisha mkataba wa Thiaw.

Baada ya kuiongoza Senegal kufika fainali ya AFCON 2025, Thiaw alitaka masharti mapya ya mkataba. Hata hivyo, mazungumzo yalichelewa kwa miezi kadhaa kutokana na taratibu za serikali na mabadiliko ya kisiasa nchini Senegal.

Hali ilifikia hatua ambapo kulikuwa na taarifa kuwa huenda kocha huyo asingesafiri kwenda Marekani kwa ajili ya Kombe la Dunia bila mkataba mpya.

Hatimaye Rais wa Senegal, Bassirou Diomaye Faye, aliingilia kati binafsi na kumhakikishia Thiaw kuwa suala hilo lingetatuliwa.

Baadaye makubaliano yalifikiwa, huku Thiaw akisaini mkataba mpya wenye thamani ya takribani pauni 480,000 kwa mwaka pamoja na bonasi ya pauni 80,000 kwa mwaka.

"Ilichukua muda mrefu sana, lakini haikuwa suala la fedha. Ilikuwa suala la kanuni na heshima. Sasa kila kitu kimetatuliwa," alisema Thiaw.

Wachezaji watuliza hali

Kipa wa Senegal, Mory Diaw, amesema matatizo yote yanashughulikiwa ndani ya timu na hayataathiri malengo yao ya mashindano.

"Sisi ni wachezaji wa kulipwa. Tupo hapa kuiwakilisha nchi yetu na hakuna kitakachotutoa kwenye lengo letu la pamoja."

Mashabiki nao walalamika

Mbali na matatizo ya ndani ya timu, mashabiki wa Senegal wanaoishi Marekani na Canada pia wameonyesha kutoridhishwa kwao.

Walisema walipatiwa tiketi 400 pekee za mechi za Kombe la Dunia na walilalamikia ukosefu wa uwazi katika ugawaji wake.

Baadhi yao walikusanyika mbele ya hoteli ya timu kuwasilisha malalamiko yao kwa viongozi wa msafara.

Mtihani mkubwa mbele yao

Baada ya kupoteza 3-1 dhidi ya Ufaransa na 3-2 dhidi ya Norway, Senegal sasa inakabiliwa na mchezo wa maisha au kifo dhidi ya Iraq.

Licha ya changamoto zote za nje ya uwanja, matumaini ya Senegal ni kwamba umoja wa kikosi na uzoefu wa wachezaji wake vitaweza kuwasaidia kugeuza hali na kuendeleza safari yao katika Kombe la Dunia 2026